Përgjatë muajit dhjetor, GreenAL organizoi një sesion trajnimi në Tiranë si pjesë e programit të subgrantimit, me fokus në Menaxhimin e Ciklit të Projektit (PCM). Ky trajnim mblodhi së bashku organizata të shoqërisë civile (OSHC), koordinatorë projektesh dhe advokues mjedisorë për të rritur kapacitetet e tyre në hartimin, menaxhimin dhe zbatimin e projekteve mjedisore. Ky trajnim ishte një komponent kyç i nismës #GreenAL, e cila mbështet OSHC-të në drejtimin e zhvillimit të qëndrueshëm në Shqipëri duke u ofruar atyre mjete dhe njohuri praktike.
Trajnimi për Menaxhimin e Ciklit të Projektit u strukturua për të ndihmuar pjesëmarrësit në menaxhimin e plotë të ciklit të projektit – nga konceptimi dhe planifikimi te zbatimi, monitorimi dhe raportimi. Sesionet mbuluan, ndër të tjera, mundësitë e financimit, procedurat e aplikimit dhe hapat e nevojshëm për të zhvilluar projekt propozime konkurruese. Pjesëmarrësit gjithashtu fituan njohuri mbi menaxhimin financiar, duke përfshirë kostimin e aktiviteteve, monitorimin e buxhetit dhe përmbushjen e kërkesave të raportimit.
Një sesion i dedikuar eksploroi rëndësinë e përfshirjes së parimeve të barazisë gjinore në planifikimin dhe zbatimin e projektit. Pjesëmarrësit diskutuan se si këto parime mund të përmirësojnë qëndrueshmërinë dhe efektivitetin e projekteve mjedisore, duke siguruar gjithëpërfshirje dhe sukses afatgjatë.
Përgjatë trajnimit u zhvilluan gjithashtu aktivitetet praktike, duke i lejuar pjesëmarrësit të aplikojnë konceptet teorike në praktikë, nëpërmjet shkrimit të një concept ideje. Këto aktivitete u fokusuan në ndërtimin e punës ekipore, të menduarit kritik dhe përshtatshmërisë—aftësi thelbësore për menaxhimin e ciklit të projektit.
Një sesion tjetër u përqendrua në strategjitë e brandimit, vizibilitetit dhe komunikimit, duke ofruar teknika praktike për të rritur vizibilitetin dhe për të siguruar që projektet të lidhen në mënyrë efektive me palët e interesuara dhe komunitetin më të gjerë. Kjo qasje theksoi rëndësinë e krijimit të mesazheve të qarta, bindëse për të maksimizuar shtrirjen dhe ndikimin e nismave mjedisore.
Trajnimi përfundoi me fokus në bashkëpunimin dhe inovacionin, duke inkurajuar pjesëmarrësit të adresojnë sfidat mjedisore me qasje strategjike dhe gjithëpërfshirëse. Duke thelluar njohuritë e tyre në Menaxhimin e Ciklit të Projektit, trajnimi rriti kapacitetin e organizatave mjedisore që punojnë drejt zhvillimit të qëndrueshëm në Shqipëri.
GreenAL do të vazhdojë të mbështesë organizatat e shoqërisë civile me fokus mjedisor duke ofruar mjete, njohuri dhe aftësi për të trajtuar në mënyrë efektive sfidat mjedisore. Nëpërmjet trajnimeve dhe aktiviteteve të vazhdueshme, nisma synon të rrisë kapacitetet e organizatave në të gjithë Shqipërinë.
